Ako si Brian

Ako si Brian
matalinong bata..
umiihi sa kama..
ninja moves sa chikas..

mahilig manuod ng movies.. Aldub fan din..
nagseselfie at video kasama mga toys na mini..

Kailangan ko iwan pansamantala ang aking pamilya..
Aantayin ko na lang ang aming muling pagsasama..

Ang Mama ko?
Mahal na mahal ko siya.
Lahat ng gusto ko ay naibigay niya.

Napakasarap niya magluto.
Pati pagbi-bake, siya ay natuto.
Ayokong nasasaktan ang Mama ko.
Kaya sa aking pagalis.. gusto ko nakangiti lang ito.

Si Papa ko ang lagi kong kalaro.
Ang kakulitan ko ay sa kanya hango.
Binibigay niya ang aking mga hiling.

Pati huling letratong kumpleto, pumayag na rin.
Hindi man siya perpekto, siya’y mahal ko.
Kaya miss ko siya pag nakasakay sa barko.

Ang Ate Ekang ko..
kinukulit ko lagi..

Siya ang may alam ng gawain ko parati.
Laging may pasalubong kahit ako’y bossy..
Dahil alam kong mahal niya akong tangi.

Ang aking Mommy Tess ay paborito ako.
Pag miss ko na siya, tatawag lang ako.
Pag nasa Bayani, lagi ko siyang katabi matulog. Pag-aalaga niya ay sadyang lubos.

Ayaw na ayaw niyang nahihirapan ako.
Ayaw niya ding nasasaktan ako. Huwag mong susubukan. Aba lagot!
Kung sakali, siya ang makakalaban mo.

Si Daddy Bao ang aking kakampi.
Pag nasa Bayani siya,
ako ay dali dali.

Madami akong pasalubong galing kay Daddy. Mga magic at jokes niya, napapatawa kami parati. Kahit na malayo, tinatawagan niya ako lagi.

Si Nanay at Tatay..
Ako ay minahal.
Binibigay lahat ng kaya nilang ibigay. Salamat sa inyong pag-aaruga, ako ay lumaking sagana sa lahat.

Ang aking Tito Rogie,
Kalaro kong lagi. Makulit man ako, nasa kwarto nila ako parati.

Pati si Ninang Reggie,
Maganda ang bigay lagi. Ang aming mga tawa ang maririnig mong tinig.

Ang aking Ninong Jannus at Tita Japs, pinagpractice-an pa ako.
Ako ang una nilang baby bago pa kay Seth at Dom.

Mga laruan ni Tito pinalaro niya ako. Salamat na lang at di na siya madamot..
Kami ni Tita Japs nahilig kay Spongebob. Sabay na dilat hanggang madaling araw.

Mga pinsan kong mahal ay napakadami..
Ang aking kuya PV ay dinadalaw ako parati.

Kalaro at kakulitan ko naman si Athena at Patty. Ang aking mga pinsang magagandang babae.

Si Dominic phone pal ko nuon pa man. Lagi ko siyang ka-akbay, sa letrato man o kainan.
Si Seth ay kaholding hands ko pa lamang.

Si Granny Phu ay lagi kong kakwentuhan..
Kala ata nito, ako ay kaedad niya lamang..
Mga jokes niya.. bentang benta.
Kaya kayong mga pinsan ko.. tawanan niyo lang siya para makalimutan niya ang kanyang problema..

Para sa iba ko pang mga lola, kalaro, kaklase, tito at tita..

Lahat kayo ay aking mami-miss.
Aking pasasalamat ay namumutawi.

Lumaki akong di salat sa pag-ibig.
Ang sandaling buhay ko sa mundo ay masayang labis.

Isipin niyo na lang na ako’y tulog lamang, nagpapahinga muna kasama ang Maykapal. Ako ay manunuod sa inyong mga gawain, sasabay sa mga halakhak at lungkot niyo din.

Ako si Brian,
mahilig ako mangolekta ng laruan, magvideo at maglaro online.

Salamat sa sandaling taon na kayo’y aking nakasama. Ako ay inyong tunay na pinasaya. Ang aking papel sa mundo ay nagawa ko na. Huwag kayong mag-alala ako ay masaya na.

Salamat sa laruan.. sa kasiyahan at sa memorya..
Salamat sa atensyon, sa oras at pag-aaruga.

Salamat sa pagmamahal, panalangin at kasiyahan.
Lahat ng iyan ay baon ko sa kalangitan.

Hindi man ako nakapagaral nang matagal.
Ang makasama ko kayo ay sapat nang aral.
Nawa ang aking buhay ay inyo ding maging aral.
Na ang buhay ay puno ng pagsubok lamang..

Kung ang batang paslit na gaya ko ay nalagpasan ang hirap..
Ano pa kaya ikaw na malakas at kayang magsikap. Sa bawat pagsubok, ngumiti ka lamang. Huwag kalimutang Diyos ang unang lapitan.